Олон улсын бага хуралд гадаадын хөрөнгө оруулалттай хуулийн этгээдийн бүртгэлийн талаар танилцуулав

Монгол Улсад үндэсний банк, санхүүгийн тогтолцоо үүсэж, хөгжсөний 95 жилийн ой тохиолдож буйтай холбогдуулан Монголбанк “Хөрөнгө оруулалтын орчин: Тогтвортой байдал” сэдэвт олон улсын бага хурлыг Олон улсын санхүүгийн корпораци болон Үндэсний хөгжлийн газартай хамтран өнөөдөр /2019.10.22/ зохион байгууллаа.

Дэлхийн худалдааны маргаан, эдийн засгийн удаашралаас үүдэн манай экспортын голлох эрдэс бүтээгдэхүүний үнэ ирэх жилүүдэд буурах төсөөллийг ихэнх судалгааны байгууллагууд гаргаад байгаа юм. Экспортын голлох түүхий эдийн үнийн уналт нь улсын хэмжээнд 2020-2024 онд төлөгдөх 14.4 тэрбум ам.долларын гадаад өрийн төлбөртэй давхацсан тохиолдолд эдийн засгийг бүхэлд нь эрсдэлд оруулж болзошгүй талаар судлаачид анхааруулж байгаа билээ. Иймд эдийн засагт үүсч болзошгүй энэхүү сорилтод урьдаас бэлтгэлтэй байж, тогтвортой өсөлтөө хадгалахад анхаарах бодит шаардлага тулгараад байгаа тул Монголбанкнаас санаачлан гадаадын шууд хөрөнгө оруулалтыг татах, бизнесийн таатай орчныг бүрдүүлэх чиглэлээр уг бага хурлыг зохион байгуулж байгаа юм байна.

Хурлыг Монгол Улсын сайд, Засгийн газрын Хэрэг эрхлэх газрын дарга Л.Оюун-Эрдэнэ нээж хэлсэн үгэндээ, гадаадын хөрөнгө оруулалттай аж ахуйн нэгжүүд Монгол Улсын татварын нийт орлогын 20 хувийг бүрдүүлж байгаа нь манай эдийн засагт гадаадын шууд хөрөнгө оруулалтын үзүүлэх нөлөөг илтгэн харуулж байна. Гадаадын хөрөнгө оруулагчдын итгэлийг сэргээх, хөрөнгө оруулалтыг татах тодорхой зорилго, зорилтууд Монгол Улсын Засгийн газрын 2016-2020 оны Үйл ажиллагааны хөтөлбөрт тусгагдсан. Үүнийг хэрэгжүүлэхийн тулд шинэ хөрөнгө оруулагчдад таатай нөхцлийг бүрдүүлэх, бүх хөрөнгө оруулагчдын эрхийг хамгаалах, олон улсын шилдэг туршлагыг нэвтрүүлэхийн төлөө бид ажиллаж байна хэмээн тэмдэглэв.

Уг олон улсын бага хурал дөрвөн салбар хуралдаанаар үргэлжилсэн бөгөөд “Хөрөнгө оруулалтын орчныг сайжруулах бодит алхмууд” хоёрдугаар салбар хуралдааны хэлэлцүүлэгт Улсын бүртгэлийн ерөнхий газрын дарга Б.Баасандорж оролцож, гадаадын хөрөнгө оруулалттай хуулийн этгээдийн улсын бүртгэлийн талаар дэлгэрэнгүй мэдээлэл хийв. Тэрбээр, улсын бүртгэлийн мэдээллийн санд 2019 оны 10 дугаар сарын 18-ны өдрийн байдлаар нийт хуулийн этгээд 192,244 байгаагаас гадаадын хөрөнгө оруулалттай хуулийн этгээд 9,046, гадаадын хөрөнгө оруулалттай нөхөрлөл 8, гадаадын хуулийн этгээдийн төлөөлөгчийн газар 555 бүртгэлтэй байна. Улсын бүртгэлийн багц хууль батлагдсанаас /2018.06.21/ хойших хугацаанд хэд хэдэн томоохон ажлууд хэрэгжээд байна. Гадаадын хөрөнгө оруулалттай хуулийн этгээдийн бүртгэлийн хүрээнд Монгол Улсын Ерөнхий сайдын 2018 оны 186 дугаар захирамжаар “Нэг цэгийн үйлчилгээний төв” байгуулагдсан. Өмнө нь гадаадын хөрөнгө оруулалттай хуулийн этгээд материалаа бүрдүүлж, 5 өөр газар хүргүүлэхэд хуулиндаа ажлын 10 өдөрт багтаан бүртгүүлэх ёстой боловч амьдрал дээр энэ хугацаанд багтаахад бэрхшээлтэй байсан бол “Нэг цэгийн үйлчилгээний төв” бий болсноор ажлын 5 өдөр болсон. Үүнд хуулийн этгээдийн мэдээллийг цахимжуулах ажил үр дүнгээ өгч гадаадын хөрөнгө оруулагчид бүх үйлчилгээгээ нэг дороос авах боломж бүрдсэн.

Түүнчлэн 2018.11.01-нээс burtgel.mn цахим хуудас ашиглалтад орсноор цахим үйлчилгээний тус системээр дамжуулан 8 төрлийн лавлагааг үнэ төлбөргүй олгож байна. Энэ онд багтаан тамга, тэмдгийн хяналтын системийг ашиглалтад оруулахаар төлөвлөж байгаа бөгөөд бүртгэлийн үнэн зөв байдлыг хангах, төрийн үйлчилгээг түргэн шуурхай авах нөхцөлийг бүрдүүлэхээр улсын бүртгэлийн байгууллага ажиллаж байна гэв.

Уг олон улсын бага хурлаар бодлого боловсруулагчид, бизнес эрхлэгчид, гадаад улсаас Монгол Улсад суугаа Элчин сайдууд, төрийн байгууллагын мэргэжилтнүүд, гадаад болон дотоодын хөрөнгө оруулагчид Монгол Улсын хөрөнгө оруулалтын өнөөгийн орчин, тулгарч буй сорилтууд; Хөрөнгө оруулалтын орчныг сайжруулах бодит алхмууд; Эдийн засгийн өрсөлдөх чадвар болон төрөлжилтөд хөрөнгө оруулалтын үзүүлэх нөлөөлөл; чиглэлээр хэлэлцэж, зөвлөмж гаргалаа.

Түүнчлэн хэлэлцүүлгийн явцад гарсан саналд үндэслэн хөрөнгө оруулалтын орчинг сайжруулах бодлогын нэгдсэн зөвлөмжийг хувийн хэвшил, хөрөнгө оруулагчдын төлөөллөөс гаргав.