Хяналтын улсын байцаагч нарыг мэргэшүүлэх сургалт нийслэлд зохион байгуулагдаж байна

A- A A+
Хяналтын улсын байцаагч нарыг мэргэшүүлэх сургалт нийслэлд зохион байгуулагдаж байна

Улсын бүртгэлийн ерөнхий газрын Хяналт шалгалтын газраас 2019 оны 12 дугаар сарын 12, 13-ны өдрүүдэд нийслэл, орон нутаг дахь газар, хэлтсийн хяналтын /ахлах/ байцаагчийн хууль, эрх зүйн мэдлэгийг дээшлүүлэх, бүртгэлийн үйл ажиллагаанд тавих хяналтын чиг үүргийг хэрэгжүүлэхэд шаардлагатай мэдлэг олгохоор хоёр өдрийн сургалт зохион байгуулж байна.

Сургалтыг Хяналт шалгалтын газрын даргын албан үүргийг түр орлон гүйцэтгэгч Б.Ганзориг удирдаж, УБЕГ-ын дарга Б.Баасандорж нээв. Тэрбээр, улсын бүртгэлтэй холбоотой хууль тогтоомж, түүнийг үндэслэн эрх бүхий байгууллагаас гаргасан нийтээр дагаж мөрдөх дүрэм, журам, зааврын биелэлтийг хангуулах нь улсын хяналтын байцаагч нарын үүрэг. Улсын хяналтын байцаагч сайн ажилласнаар улсын бүртгэлийн төгөлдөршил бий болно. Иймд 2020 оныг хариуцлагын жил болгоход хяналтын улсын байцаагч бүр анхаарч, хуулийн өмнө болоод иргэдийн өмнө хүлээсэн үүргээ ухамсарлах хэрэгтэй гээд нийт сургалтанд оролцогчдод амжилт хүсэв.

Үргэлжлүүлэн УБЕГ-ын Захиргаа, хүний нөөцийн хэлтсийн дарга Г.Мөнхцэцэг “Төрийн захиргааны болон үйлчилгээний албан хаагчин ёс зүй, үйлчилгээний стандарт”, Монголбанкны ерөнхийлөгчийн зөвлөх Б.Гантуяа “Мөнгө угаах болон терроризмыг санхүүжүүлэхтэй тэмцэх тухай хууль”, УБЕГ-ын Хяналт шинжилгээ үнэлгээ, дотоод аудитын газрых ахлах мэргэжилтэн Ш.Уртнасан “Төрийн албан хаагчийн гүйцэтгэлийн төлөвлөгөө, боловсруулах, тайлагнахад анхаарах асуудал”, УБЕГ-ын Мэдээллий технологийн газрын дарга Д.Ган-Эрдэнэ “Мэдээллийн аюулгүй байдал, програм хангамж” сэдвийн дор тус тус мэдээлэл хийж, оролцогчдын сонирхсон асуултад дэлгэрэнгүй хариулт хийсэн юм.

Сургалтанд нийслэл, орон нутгийн хяналтын улсын нийт 52 байцаагч оролцож байгаа ба маргааш УБЕГ-ын Эд хөрөнгийн эрхийн улсын бүртгэлийн газрын дарга Б.Ариунболд, Хуулийн этгээдийн улсын бүртгэлийн газрын дарга Ж.Ауюш, Иргэний улсын бүртгэлийн газрын дарга Т.Нармандах, мөн Улсын дээд шүүхийн Иргэний хэргийн танхим, Цагдаагийн ерөнхий газар, Шүүх шинжилгээний үндэсний хүрээлэн болон бусад албаны хүмүүс илтгэл тавьж, мэдээллээр хангах юм.