Support 
Улсын Их Хурал, Засгийн газраас “Монгол Улсын иргэний шинэчилсэн бүртгэлийг явуулах, үүнтэй холбогдуулан иргэний ухаалаг үнэмлэх олгох суурь дэд бүтэц, иргэний биеийн өгөгдөлд суурилсан мэдээллийн нэгдсэн санг бий болгох, иргэнд хувь, хишиг хүртээх үйл ажиллагааг иргэний шинэчилсэн бүртгэлтэй уялдуулан зохион байгуулах ажлыг 2010 оны 7 дугаар сарын 5-ны өдрөөс эхлүүлээд байна.
Иргэний шинэчилсэн бүртгэлийг 21 аймгийн 331 сум, нийслэлийн 9 дүүргийн 132 хороо, нийт 468 бүртгэлийн нэгжид явуулж байна. Монгол Улсын иргэний шинэчилсэн бүртгэлээр Монгол Улсын иргэний төрсний болон иргэний үнэмлэхийн, байнгын оршин суугаа газрын бүртгэлийг баталгаажуулан, биеийн давхцахгүй өгөгдлийн бүртгэл /гарын 10 хурууны хээ/-д шинээр бүртгэж, иргэний биеийн давхцахгүй өгөгдлийг бүртгэлийн болон иргэний гэрэл зургийн мэдээллийн санг үүсгэж байна. Монгол Улсын иргэний бүртгэл нь мэдээлэлд суурилсан хэлбэрээр хөтлөгдөж ирсэн бол иргэний шинэчилсэн бүртгэл нь орчин үеийн бүртгэлийн чиг хандлага болох биеийн давхцахгүй өгөгдлийн бүртгэлд суурилж байгаагаараа онцлогтой.
Төрөөс иргэд, байгууллагад үзүүлэх үйлчилгээг хүртээмжтэй, шуурхай, үр ашигтай, бодитой, тэгш, шударга хүргэх нөхцөлийг бүрдүүлэх, төрийн байгууллагуудын үйл ажиллагааны уялдаа холбоог сайжруулах, иргэний эрхийг хамгаалах, үндэсний аюулгүй байдлыг хангахад иргэний шинэчилсэн бүртгэлийн ач холбогдол оршиж байна. Монгол Улсын иргэний шинэчилсэн бүртгэл, түүний үр дүнд үүсэж байгаа мэдээллийн бааз нь цахим иргэний үнэмлэх нэвтрүүлэх анхдагч, суурь дэд бүтэц болох бөгөөд “Иргэний цахим үнэмлэх” нийгмийн бүх төрлийн үйлчилгээ /нийгмийн халамж, татвар, даатгал, санхүү, сонгуульд г.м/-ний суурь болно. Засгийн газраас иргэний шинэчилсэн бүртгэлийн мэдээлэлд суурилсан, тухайн иргэний хувийн мэдээллийг агуулсан, өндөр нууцлалтай «Иргэний цахим үнэмлэх» бий болгох, хэрэглээнд нэвтрүүлэх ажлыг хэрэгжүүлэхээр төлөвлөж байна. Ингэснээр төрийн бодлогын нэгдмэл чанарыг хангах, үндэсний аюулгүй байдлыг бэхжүүлэх, улс орны эдийн засгийн өсөлтөд дэмжлэг үзүүлэх, төрөөс иргэд болон бизнесийн байгууллагад үзүүлэх нийгмийн бүх салбарыг хамарсан үйлчилгээг хүртээмжтэй, шуурхай, үр ашигтай болгох боломж бүрдэх юм.