Support 
Улсын бүртгэлийн ерөнхий газрын дарга Б.Баасандорж Бүгд Найрамдах Эстони Улсын Цахим засаглалын академийн захирал, доктор Арво Отто тэргүүтэй төлөөлөгчдийг өнөөдөр /2020.02.04/ хүлээн авч уулзлаа.
Эстони Улс цахим засаглалыг хөгжүүлсэн туршлагаараа дэлхийн тэргүүлэгч орон бөгөөд тус улсын тэргүүн туршлагыг судлах ажлын хүрээнд Монгол Улсын Засгийн газраас хэд хэдэн томоохон ажил зохион байгуулж байна. Тухайлбал, Монгол Улсын сайд, Засгийн газрын Хэрэг эрхлэх газрын дарга Л.Оюун-Эрдэнэ тэргүүтэй төлөөлөгчид 2019 оны 09 дүгээр сард Бүгд Найрамдах Эстони Улсын Таллин хотод албан томилолтоор ажиллаж, Монгол Улсын Засгийн газраас баримталж буй үндэсний хөтөлбөр, баримт бичгүүдэд цахим засгийг хөгжүүлэх, төрөөс иргэдэд үзүүлж байгаа үйлчилгээг цахим хэлбэрт шилжүүлэх бодлого, зорилт зэрэг нэлээдгүй олон арга хэмжээнүүд төлөвлөгдсөн талаар санал солилцсон. Уг зорилтын хүрээнд 2019 оны 12 дугаар сарын 04-ний өдөр зохион байгуулагдсан “Е-Mongolia” форумаас гарсан зөвлөмжийг үндэслэн Засгийн газрын 2019 оны 458 дугаар тогтоолоор “Цахим хөгжлийн үндэсний хороо” байгуулагдсан байна.
Цахим хөгжлийн үндэсний хороо нь Эстони Улсын Цахим засаглалын академитай хамтран Монгол Улсын төрийн үйлчилгээг иргэдэд ээлтэй, хялбар, хүртээмжтэй байдлаар хүргэх зорилготойгоор төрийн болон хувийн хэвшлийн байгууллагуудтай хамтран ажиллаж байгаа ба энэхүү хамтын ажиллагааны хүрээнд улсын бүртгэлийн байгууллагын цахимжилтын өнөөгийн байдал, иргэдэд үзүүлдэг цахим үйлчилгээ болон тус байгууллагаас цаашид хийж хэрэгжүүлэхээр төлөвлөж буй асуудлуудын талаар талууд өнөөдрийн уулзалтаар санал солилцсон юм.
Уулзалтаар УБЕГ-ын дарга Б.Баасандорж Эстони Улсын тэргүүн туршлагаас улсын бүртгэлийн байгууллагад нэвтрүүлэхээр зорьж буй ажлаа танилцуулж, амжилттай хэрэгжүүлэхэд талууд дахин уулзан санал солилцоно гэдэгт итгэлтэй буйгаа хэлж байв. Доктор Арво Отто Улсын бүртгэлийн ерөнхий газраас хэрэгжүүлж буй ажилд сэтгэл өндөр байгаагаа илэрхийлж, хоёр байгууллагын цаашдын хамтын ажиллагаа чухал болохыг онцолж байв.
Уулзалтад УБЕГ-ын Тамгын газрын дарга Г.Цолмон, Мэдээллийн технологийн газрын дарга Д.Ган-Эрдэнэ, Хамтын ажиллагаа, сургалтын хэлтсийн дарга Г.Хэрлэн, Бүгд Найрамдах Эстони Улсын Цахим засаглалын академийн дэд захирал Ханнес Асток, ЗГХЭГ-ын даргын зөвлөх, Цахим хөгжлийн үндэсний хорооны ажлын албаны дарга Б.Болор-Эрдэнэ, Цахим хөгжлийн үндэсний хорооны ажлын албаны технологи хариуцсан мэргэжилтэн С.Тэнгис нар оролцлоо гэж УБЕГ-ын Хамтын ажиллагаа, сургалтын хэлтсээс мэдээлэв.